WhatsApp SIM Binding Feature: જો તમે પણ તમારા ફોનમાં સિમ કાર્ડ વગર કે બીજા કોઈ નંબરનું વૉટ્સએપ વાપરી રહ્યા છો, તો આ સમાચાર તમારા માટે ખૂબ જ મહત્વના છે. ભારત સરકારના ડિપાર્ટમેન્ટ ઓફ ટેલિકોમ્યુનિકેશન (DoT) ના આદેશ પર અમલ કરતા, વૉટ્સએપ હવે ‘સિમ બાઈન્ડિંગ’ ફીચર લાવી રહ્યું છે. આ નવા નિયમ બાદ, જે નંબરનું વૉટ્સએપ તમારા ફોનમાં ચાલતું હશે, તે નંબરનું સિમ કાર્ડ પણ તે જ ફોનમાં હોવું ફરજિયાત બનશે.
શું છે આ ‘સિમ બાઈન્ડિંગ’ (SIM Binding)?
સરળ ભાષામાં કહીએ તો, વૉટ્સએપ હવે તમારા એકાઉન્ટને તમારા ફોનમાં રહેલા ભૌતિક સિમ કાર્ડ સાથે લિંક (Bind) કરી દેશે.
- જો તમે ફોનમાંથી સિમ કાર્ડ કાઢી નાખશો, તો વૉટ્સએપ આપમેળે લોગઆઉટ થઈ જશે.
- તમે હવે વાઇ-ફાઇ (Wi-Fi) પર એવા ફોનમાં વૉટ્સએપ નહીં ચલાવી શકો જેમાં સિમ કાર્ડ નાખેલું ન હોય.
- આ ફીચર આવ્યા બાદ કમ્પ્યુટર કે વેબ પર લોગિન કરેલું વૉટ્સએપ પણ અમુક કલાકોમાં (અંદાજે 6 કલાકમાં) ઓટોમેટિક લોગઆઉટ થઈ શકે છે.
સરકારે કેમ લીધો આ નિર્ણય?
ભારતમાં વધી રહેલા સાયબર ફ્રોડ (Cyber Fraud) અને ઓનલાઈન છેતરપિંડીને રોકવા માટે આ કડક પગલું ભરવામાં આવ્યું છે. ઘણીવાર સ્કેમર્સ બીજાના નંબર પર વૉટ્સએપ એક્ટિવેટ કરીને ગુના આચરતા હોય છે. સિમ બાઈન્ડિંગથી એ સુનિશ્ચિત થશે કે વૉટ્સએપ વાપરનાર વ્યક્તિ પાસે તે નંબરનું સિમ કાર્ડ ખરેખર હાજર છે.
ક્યારે લાગુ થશે આ નવો નિયમ?
WhatsAppના લેટેસ્ટ બીટા વર્ઝન 2.26.8.6 માં આ ફીચરનો પૉપ-અપ (Pop-up) જોવા મળ્યો છે. આનો અર્થ એ છે કે વૉટ્સએપ આ ફીચરનું અત્યારે ટેસ્ટિંગ કરી રહ્યું છે અને ટૂંક સમયમાં જ તેને તમામ ભારતીય યુઝર્સ માટે રોલઆઉટ કરવામાં આવશે. નોંધનીય છે કે આ નિયમ માત્ર વૉટ્સએપ માટે જ નહીં, પરંતુ ટેલિગ્રામ અને સિગ્નલ જેવી તમામ મેસેજિંગ એપ્સ માટે પણ લાગુ થઈ શકે છે.
યુઝર્સને શું તકલીફ પડશે?
જે લોકો મલ્ટી-ડિવાઇસ ફીચરનો ઉપયોગ કરીને એક જ નંબરથી અલગ-અલગ ફોન કે ટેબલેટમાં વૉટ્સએપ ચલાવે છે, તેમને આમાં મુશ્કેલી પડી શકે છે. જો મુખ્ય ફોનમાંથી સિમ કાર્ડ નીકળ્યું અથવા ફોન સ્વીચ ઓફ થયો, તો અન્ય ડિવાઇસમાં વૉટ્સએપ ચલાવવું મુશ્કેલ બનશે.
આ પણ વાંચો: સ્લો ફોનથી પરેશાન છો? આ 5 ટિપ્સ તમારા એન્ડ્રોઇડને બનાવશે રોકેટ જેવો ફાસ્ટ!