Rajkot Kotda Sangani Blast Today: રાજકોટ જિલ્લાના કોટડાસાંગાણી પંથકમાં આજે બપોરના સમયે અચાનક ભેદી ધડાકા થતા ભયનો માહોલ ફેલાઈ ગયો હતો. પ્રચંડ અવાજની સાથે ધરતી ધ્રુજી ઉઠતા લોકો ફફડાટના માર્યા ઘરની બહાર દોડી આવ્યા હતા. બપોરના શાંત વાતાવરણમાં થયેલા આ ધડાકાનો અવાજ છેક આસપાસના ગ્રામ્ય વિસ્તારો સુધી સાંભળવા મળ્યો હતો.
Rajkot: બપોરે 12:36 કલાકે ધ્રુજી ઉઠી ધરતી
મળતી માહિતી મુજબ, આજે બપોરે બરાબર 12:36 મિનિટે કોટડાસાંગાણી અને તેની આસપાસના વિસ્તારોમાં એકાએક ભેદી અવાજ સંભળાયો હતો. આ અવાજ એટલો પ્રચંડ હતો કે જાણે મોટો ધડાકો થયો હોય તેમ ધરતી ધ્રુજવા લાગી હતી. જે સમયે આ ધડાકા થયા ત્યારે મોટાભાગના લોકો ઘરોમાં આરામ ફરમાવી રહ્યા હતા, પરંતુ ધ્રુજારી અનુભવાતા જ સૌ જીવ બચાવવા ખુલ્લા મેદાનમાં દોડી આવ્યા હતા.
ધડાકો કે ભૂકંપ? લોકોમાં ચર્ચા
ધડાકા બાદ કોટડાસાંગાણી સહીત આસપાસના ગ્રામ્ય વિસ્તારોમાં પણ ધરતી ધ્રુજી હોવાના અહેવાલ છે. લોકોમાં ભારે ઉત્તેજના અને ચર્ચા જોવા મળી રહી છે કે આ અવાજ શેનો હતો? ઘણા લોકો તેને ભૂકંપનો આંચકો માની રહ્યા છે, તો વળી કેટલાક લોકો તેને વિમાનના સોનિક બૂમ (Sonic Boom) અથવા કોઈ ફેક્ટરીમાં થયેલા વિસ્ફોટ સાથે જોડી રહ્યા છે. જોકે, હજુ સુધી તંત્ર દ્વારા કોઈ સત્તાવાર પુષ્ટિ કરવામાં આવી નથી.
ભયને કારણે બજારોમાં સન્નાટો
અચાનક થયેલી આ ઘટનાને કારણે સ્થાનિક રહીશોમાં પોતાની સુરક્ષાને લઈને ચિંતા જોવા મળી રહી છે. લોકો એકબીજાને ફોન કરીને ખબર-અંતર પૂછી રહ્યા છે. ખાસ કરીને ગ્રામ્ય વિસ્તારોમાં લોકો હજુ પણ ઘરની બહાર જ ઉભેલા જોવા મળી રહ્યા છે.
આ પણ વાંચો: મોતની ચીસોથી ધ્રુજી ઉઠ્યું અલવર!કેમિકલ ફેક્ટરીમાં પ્રચંડ ધડાકા બાદ ભીષણ આગ, 7 શ્રમિકો જીવતા ભુંજાયા
