Hyperhidrosis Symptoms and Treatment: ગરમીમાં કે મહેનતનું કામ કરતી વખતે પરસેવો આવવો એ સામાન્ય પ્રક્રિયા છે, જે શરીરના તાપમાનને જાળવી રાખે છે. પરંતુ જો તમે એસીમાં બેઠા હોવ અથવા કોઈ મહેનત વગર પણ તમારા કપડાં પરસેવાથી ભીંજાઈ જાય કે હથેળીમાંથી પરસેવો ટપકવા લાગે, તો તેને નજરઅંદાજ ન કરો. તબીબી ભાષામાં આ સ્થિતિને ‘હાઈપરહાઈડ્રોસિસ’ કહેવામાં આવે છે.
Hyperhidrosis શું છે?
નેશનલ ઇન્સ્ટિટ્યૂટ ઓફ હેલ્થ (NIH) મુજબ, જ્યારે શરીરની પરસેવાની ગ્રંથિઓ (Sweat Glands) જરૂર કરતા વધુ સક્રિય થઈ જાય છે, ત્યારે સામાન્ય કરતા વધુ પરસેવો નીકળે છે. આ સમસ્યા મોટેભાગે હથેળીઓ, પગના તળિયા, બગલ અને ચહેરા પર જોવા મળે છે.
વધારે પરસેવો આવવાના કારણો
માત્ર ગરમી જ નહીં, પણ અન્ય ગંભીર બીમારીઓના સંકેત તરીકે પણ વધુ પરસેવો આવી શકે છે:
- ડાયાબિટીસ: બ્લડ શુગર ઓછું થવા પર અચાનક પરસેવો વળે છે.
- થાઈરોઈડ: હાઈપરથાઈરોઈડિઝમમાં મેટાબોલિઝમ તેજ થવાથી પરસેવો વધુ આવે છે.
- હૃદયની સમસ્યા: છાતીમાં દુખાવા સાથે અચાનક પરસેવો આવવો એ હાર્ટ અટેકનો સંકેત હોઈ શકે છે.
- તણાવ અને ચિંતા: માનસિક તણાવના કારણે પરસેવાની ગ્રંથિઓ ઉત્તેજિત થાય છે.
- મેનોપોઝ: મહિલાઓમાં હોર્મોનલ ફેરફારને કારણે ‘હોટ ફ્લેશિસ’ અનુભવાય છે.
વધારે પરસેવાથી થતી સમસ્યાઓ
અમેરિકન એકેડેમી ઓફ ડર્મેટોલોજી મુજબ, સતત પરસેવાના કારણે ત્વચા સફેદ કે ગુલાબી પડી જાય છે. ત્વચામાં સોજો, બળતરા કે બેક્ટેરિયલ ઇન્ફેક્શન થવાનું જોખમ રહે છે. આ ઉપરાંત વ્યક્તિને સામાજિક રીતે શરમ અને આત્મવિશ્વાસમાં ઘટાડો અનુભવાય છે.
ક્યારે લેવી જોઈએ ડોક્ટરની સલાહ?
મેયો ક્લિનિકના જણાવ્યા અનુસાર, જો નીચેની સ્થિતિ જણાય તો સારવાર જરૂરી છે:
- 6 મહિનાથી વધુ સમય સુધી સતત વધુ પરસેવો થતો હોય.
- અઠવાડિયામાં એક કરતા વધુ વખત અચાનક પરસેવો વળી જતો હોય.
- રાત્રે ઊંઘતી વખતે પણ પરસેવો આવતો હોય.
- પરસેવાની અસર તમારી રોજિંદી પ્રવૃત્તિઓ પર પડતી હોય.
- જો પરિવારમાં અન્ય કોઈને પણ આ પ્રકારની સમસ્યા હોય.
જીવનશૈલીમાં કરો આ ફેરફાર
- સુતરાઉ કપડાં: હંમેશા કોટનના કપડાં અને મોજા પહેરો જેથી ત્વચા સૂકી રહે.
- સ્વચ્છતા: દિવસમાં બે વાર અન્ડરવેર અને મોજા બદલો.
- ખોરાક: વધુ પડતો મસાલેદાર કે તળેલો ખોરાક ટાળવો. હળવો અને પૌષ્ટિક આહાર લેવો.
- એન્ટીપર્સપીરન્ટ: રાત્રે સૂતા પહેલા ડોક્ટરની સલાહ મુજબ એન્ટીપર્સપીરન્ટનો ઉપયોગ કરો.
આ પણ વાંચો: Life Style : “પરફેક્ટ” નહીં, “ખુશ” લાઈફસ્ટાઈલ કેવી રીતે જીવવી?